- 2018-01-01 22:31:00
- ជីវិតតារា
សៅ សូត្រទំរង់ពេជ្រ ប្ដេជ្ញាលើ២ចំណុចធំៗ ក្រោយគ្រងមកុដ១ពីអន្តរជាតិ
- 2018-01-01 22:31:00
- ចំនួនមតិ 0 | ចំនួនចែករំលែក 0
សៅ សូត្រទំរង់ពេជ្រ ប្ដេជ្ញាលើ២ចំណុចធំៗ ក្រោយគ្រងមកុដ១ពីអន្តរជាតិ
ចន្លោះមិនឃើញ
ក្រោយទទួលបានមកុដជាកញ្ញាឯករងទី៣ ពីកម្មវិធីប្រកួតសម្រស់លក្ខណៈអន្តរជាតិ "បវរកញ្ញាសាកលវិទ្យាល័យ" ឬ "World Miss University" ឆ្នាំ២០១៧ កញ្ញាឯក សៅ សូត្រទំរង់ពេជ្រ ដែលធ្លាប់មានសន្ដានចិត្តស្មោះសរជួយសង្គម បានប្រាប់ពីជំហរធំៗ២ ដែលខ្លួនត្រូវប្រកាន់ខ្ជាប់ និងសម្រេចឲ្យបានក្រោយឈរលើតំណែងនេះ។
ជានារីម្នាក់ដែល ធ្លាប់ត្រូវបានគេទិតៀនចំពោះសម្រស់ ទំរង់ពេជ្រ រំលឹកថាជោគជ័យនេះ គឺជាការបកត្រលប់ទៅមនុស្សទាំងឡាយដែលនិយាយថា នាងគ្មានផ្លូវនឹងទទួលបានជយលាភីទេ បើសម្រស់នាងមិនសូវស្អាត តែជាចុងក្រោយនាងអាចធ្វើវាបានជាមួយលទ្ធផលលើសពីអ្វីដែលអ្នករិះគន់ទាំងនោះរំពឹងទុកទៅទៀត។
ទំរង់ពេជ្រ បន្ថែមថា៖ "ខ្ញុំចង់ចែករំលែកបទពិសោធន៍ទៅកាន់ស្រ្ដី និងយុវតីទាំងអស់ដែលធ្លាប់ប្រទះបញ្ហានេះថា ត្រូវតែក្រោយឈរឡើងដោយរឹងមាំ ហើយតស៊ូដើម្បីក្ដីសុបិន និងអ្វីដែលខ្លួនស្រឡាញ់ ព្រោះនៅទីបញ្ចប់មានតែខ្លួនឯងទេ ដែលនឹងរីករាយ ឬកើតទុក្ខចំពោះវា។ មិនថាលទ្ធផលទៅយ៉ាងម៉េចនោះឡើយ វាប្រសើរជាងការជឿលើពាក្យពេចន៍អវិជ្ជមានទាំងនោះ ហើយបោះបង់ក្ដីស្រមៃរបស់ខ្លួន"។
ភ្ជាប់ជាមួយបទពិសោធន៍នេះ ម្ចាស់ចំណាត់ថ្នាក់កំពូលទី៤ក្នុងចំណោមបេក្ខនារី ៨៣នាក់មកពីជុំវិញពិភពលោកក្នុងកម្មវិធីខាងលើ ចង់ឃើញស្រ្តីទាំងអស់ទទួលបានការអប់រំខ្ពស់ ដូច្នេះនាងសុំជំរុញឲ្យស្ដ្រីគ្រប់រូបត្រូវឈរដោយជំហររឹងមាំ ហើយពុះពារគ្រប់បែបយ៉ាងដើម្បីទទួលបានការសិក្សាខ្ពស់ ព្រោះការសិក្សាអាចធ្វើឲ្យជីវិតឈានទៅរកភាពល្អប្រសើរ និងអាចផ្លាស់ប្ដូរជីវិតស្ត្រីឲ្យកាន់តែថ្កុំថ្កើងឡើង។
កញ្ញាឯកវ័យ២៣ឆ្នាំសង្កត់ន័យថា "ស្រ្ដីដែលមានចំណេះដឹង ប្រៀបដូចជាបវរកញ្ញាគ្រងមកុដដែលមានពន្លឺចែងចាំងជាងគេ និងភ្លឺថ្លាជានិច្ចនិរន្ត" ។
ដោយមានទឹកចិត្ត និងទម្លាប់ចុះជួយសហគមន៍ជារឿយៗ បវរកញ្ញាសាកលវិទ្យាល័យតំណាងកម្ពុជា ប្រាប់ថា ខ្លួននៅតែបន្តធ្វើការស្ម័គ្រចិត្តធ្វើការងារនេះ។ និស្សិតសិក្សាផ្នែកភាសាអង់គ្លេសរូបនេះ នឹងយកចិត្តទុកដាក់ធ្វើកម្មវិធីសប្បុរសធម៌ និងជួយដល់កុមារដែលត្រូវការចំណេះដឹងទាំងឡាយតាមដែលអាចធ្វើបាន។
"ខ្ញុំនឹងបង្កើតមូលនិធិ១ដើម្បីរៃអង្គាសថវិកា ហើយសាកលវិទ្យាល័យរបស់ខ្ញុំ (PUC) នឹងជ្រោមជ្រែងចំពោះគម្រោងនេះ ហើយប្រហែលជាដើម ឬចុងខែក្រោយពួកយើងនៅចុះធ្វើការងារសហគមន៍នៅគិរីរម្យ។ ខ្ញុំនឹងបង្កើនសកម្មភាពជួយសង្គមឲ្យបានច្រើន ព្រោះខ្ញុំចង់ឃើញសហគមន៍នានាមានភាពល្អប្រសើរ។ ខ្ញុំដឹងច្បាស់ថា ខ្ញុំមិនអាចផ្លាស់ប្រទេសយើងទាំងមូលបានទេ តែហោចណាស់ខ្ញុំអាចជួយកែប្រែតំបន់មួយចំនួន តាមលទ្ធភាពដែលអាចធ្វើបាន"។
បញ្ជាក់ជាថ្មីថា កម្មវិធីប្រកួតសម្រស់លក្ខណៈអន្តរជាតិ "បវរកញ្ញាសាកលវិទ្យាល័យ" ឬ "World Miss University" ឆ្នាំ២០១៧ បានប្រព្រឹត្តចប់សព្វគ្រប់កាលពីថ្ងៃទី២០ ខែធ្នូ ឆ្នាំ២០១៧ នៅព្រះរាជាណាចក្រកម្ពុជា និងមានស្រីស្អាតមកពីប្រមាណ៨០ប្រទេសចូលរួម។
នេះជាឆ្នាំទី២៨ហើយ ដែលកម្មវិធីបានរកឃើញម្ចាស់មកុដអាណត្តិថ្មី គឺបវរកញ្ញា Claudia Moras Baez មកពីប្រទេស គុយបា។ សម្រាប់តំណែងបវរកញ្ញារងទី១បានទៅលើកញ្ញា Nina Yevtushenko មកពីអ៊ុយក្រែន រងទី២បានទៅលើកញ្ញា Daniela Gods Romanovska ប្រទេសឡាតវី ស្រពពេលដែលម្ចាស់មកុដបវរកញ្ញារងទី៣ អមតំណែង Miss Fitness បានទៅបវរកញ្ញាកម្ពុជា សៅ សូត្រទំរង់ពេជ្រ និងទី៥បានទៅ Kasia Szklarczyk តំណាងប្រទេសប៉ូឡូញ។
សម្រាប់ការប្រកួតលើទឹកដីខ្លួននេះ កម្ពុជាមានតំណាង៣រូបគឺ បវរកញ្ញា សៅ សូត្រទំរង់ពេជ្រ កញ្ញា ឡាយ ដាលីន និង កញ្ញា សំណាង អាលីណា ដែលបានលើកពាន Rosesteem Beauty ផងដែរ៕
