Sabay news entertainment

រូបភាពប៉ុន្មានសន្លឹករបស់ តាចេក ជាតារាកំប្លែងក្នុងក្រុមនាយកុយដែលកំពុងតែលក់ទឹកសុទ្ធត្រូវបានអ្នកលេង Facebook ជាច្រើនបានចែករំលែកបន្ត និងសរសេររៀបរាប់ថា"ជីវិតពិតរបស់លោកតាចេក!!! មិត្តទាំងអស់ដែលធ្វើដំណើរតាមផ្លូវជាតិលេខ២..ហួសរង្វង់មូលគួរស្រូវប្រមាណ១០០ម៉ែត្រនៅខាងស្ដាំដៃ ខាងមុខរោងចក្រ សូមជួយទិញភេសជ្ជៈគាត់ផង"។ តាចេក បាននិយាយមកកាន់ Sabay ថា"នេះរបរប្រចាំថ្ងៃរបស់ខ្ញុំបន្ទាប់ពីលេងកំប្លែងដែលអាចចំណេញបានពី ៧០០០ ទៅ ១០ ០០០ រៀលក្នុងមួយថ្ងៃ។ ដើម្បីទប់ទល់នឹងជីវភាពក្រខ្សត់ខ្ញុំត្រូវតែធ្វើ ព្រោះការកំប្លែងបានតែពីរថ្ងៃទេក្នុងមួយសប្ដាហ៍ ហើយចំណូលនេះទៀតសោតបានមកមិនសូវជាច្រើននោះទេ។” លោកបានបន្តទៀតថា "បើមិនធ្វើចឹងម៉េចអាចរស់បាន ព្រោះគ្មានលុយកាក់នឹងគេទេ ហើយរាល់ថ្ងៃត្រូវចិញ្ចឹមម្ដាយចាស់ជរាអាយុជាង ៨០ ឆ្នាំ កូនស្រីៗនៅរៀនព្រោះមិនចង់ឈប់ដោយសង្ឃឹមថាពេលរៀនបានខ្ពង់ខ្ពស់អាចរកការងារបានល្អ ណាមួយឥឡូវប្រពន្ធឈឺច្រើនមុខ លើសឈាម ឈាមសស៊ីឈាមក្រហម ខ្លាញ់ក្នុងបេះដូងផងមិនអាចធ្វើអ្វីបានទេ ចឹងហើយអ្វីទាំងអស់ខ្ញុំជាអ្នករ៉ាប់រង។” តារាកំប្លែងអាយុ ៦០ ឆ្នាំ រូបនោះបានបន្ថែមថាអ្វីដែលធ្វើឲ្យលោករឹតតែពិបាកនោះគឺត្រូវជំពាក់លុយគេទៀត ព្រោះលោកគ្មានលុយដើម្បីទិញដី និងផ្ទះ។ លោកបន្តដោយសំឡេងកម្សត់ទៀតថា "ពីមុនខ្ញុំក៏ធ្លាប់មានកូនឡានមួយដែរ តែពេលកូនការរួចគ្មានអ្វីចែកឲ្យ មានតែលក់ឡានដើម្បីទិញផ្ទះឲ្យកូនប៉ុណ្ណោះ តែឥឡូវសូម្បីតែម៉ូតូក៏គ្មានជិះដែរ ព្រោះលក់យកលុយទៅបង់ការប្រាក់អស់ហើយ រាល់អាទិត្យពេលទៅភ្នំពេញម្ដងៗត្រូវខ្ចីម៉ូតូក្មួយជិះទេ។ការលក់ដូរនេះខ្ញុំក៏គ្មានការខ្មាសអៀនអ្វីដែរ ព្រោះក្រពះត្រូវការហូប ហើយបើលើកដៃសុំគេ វាជារឿងមិនសមរម្យទេចំពោះខ្ញុំ” តារាកំប្លែងសម្ដីមិនចេះរីងស្ងួតបានបញ្ជាក់ថាក្នុងមួយខែៗ លោកអាចរកបានជាង ៤០០ ដុល្លារ ហើយបើដល់រដូវការវិញលោកថាបានប្រហែលជាង ១០០០ ដុល្លារក៏មានដែរ តែនៅមិនសល់ដដែលព្រោះលុយខ្ចីគេនឹងការប្រាក់ច្រើនខ្ពស់ពេក។ តាចេក បានសំណូមពរដលទស្សនិកជនថា"បើបានឆ្លងកាត់ផ្លូវជាតិលេខ២ កុំភ្លេចចុះជួយទិញភេសជ្ជៈខ្ញុំផង ព្រោះមិនចង់លើកដៃសូមប្រាក់ពីគេទេ មានតែលក់ដូរនេះហើយ"។ តាចេក ក៏ជាមន្ត្រីរាជការចូលនិវត្តន៍មួយរូបដែរ ហើយរាល់ថ្ងៃលោកមិនត្រឹមតែចិញ្ចឹមកូនទេ ថែមទាំងចិញ្ចឹមក្មួយ ពីរ បីនាក់ថែមទៀត៕ អត្ថបទ៖ទ្រី រ៉ាវី