Kris Wu ត្រូវជួបរឿងវិលមុខ ដោយរងការចោទប្រកាន់ថាទាក់ទងក្មេងស្រីមិនទាន់គ្រប់អាយុច្រើននាក់

2021-07-14 20:40:40
ព័ត៌មាន

2021-07-14 20:40:40
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតសមាជិក EXO គឺ Kris Wu បានក្លាយជាប្រធានបទក្ដៅគគុកពេលនេះ ដោយសារទាក់ទងនឹងការបែកធ្លាយបញ្ហាជីវិតគូរបស់ខ្លួន។

ថ្មីៗនេះ មានការបែកធ្លាយព័ត៌មានថា Kris បានកក់បន្ទប់ជប់លៀងមួយកន្លែងដែលមាននារីៗក្នុងនោះជាង ៨០នាក់ ឯអ្នកចូលរួម ម្នាក់ទៀតគឺជាមិត្តល្អ និងជាសេដ្ឋីជំនាន់ទី ២ គឺ Wang Sicong។ លើកមុន លោកធ្លាប់ល្បីម្ដងរួចទៅហើយ ពីរឿងទាក់ទងក្មេងសិស្សសាលាអាយុខ្ទង់១៨-១៩ឆ្នាំ ហើយពេលនេះ Kris ត្រូវគេចោទប្រកាន់ជាថ្មីពីបទបៀតបៀនក្មេងស្រីមិនទាន់គ្រប់អាយុ។

Kris Wu

Du Meizhu

Du Meizhu ដែលជាអតីតអ្នកលេងភ្លេងវ័យ ១៩ឆ្នាំ បានលើកឡើងថានាងបានធ្លាក់ក្នុងសភាពបាក់ទឹកចិត្តខ្លាំង បណ្ដាលមកពីការបែកបាក់ស្នេហារបស់នាង។ ថ្មីៗនេះនាងបានទម្លាយពី "គោលការណ៍" ជ្រើសសង្សាររបស់ Kris ដោយក្នុងនោះនារីៗត្រូវតែកើតក្រោយឆ្នាំ ២០០០។ នាងនិយាយថា Kris ហាក់ដូចជាមានចំណូលចិត្តជាមួយនឹងសិស្សសាលា។

ដោយឡែកទាក់ទងនឹងបញ្ហានេះ វាក្លាយទៅជារឿងធំ ដែលជម្រុញឲ្យ Kris និងក្រុមអ្នកចាត់ការរបស់លោកចេញមុខវាយបកទៅវិញភ្លាមៗ។ សេចក្ដីថ្លែងការណ៍តាមផ្លូវច្បាប់មួយត្រូវបានចេញផ្សាយ ក្នុងបំណងបដិសេធរាល់ការអះអាងរបស់ Du Meizhu។ ដោយក្នុងនោះ ពួកគេបានបញ្ជាក់ថា ការលើកឡើងរបស់នាងមិនមានមូលដ្ឋានពិតច្បាស់លាស់ ខុសឆ្ងាយពីការពិត រហូតអាចបំផ្លាញកេរ្តិ៍ឈ្មោះរបស់ Kris។ ដូចនេះក្រុមការងារធ្វើការផ្នែកផ្លូវច្បាប់ក៏ស្នើឲ្យ Du Meizhu ប្រញាប់លុបអ្វីដែលនាងបានបង្ហោះនោះចោល។ ចំណែកក្រុមការងាររបស់ Kris ក៏បានរក្សាសិទ្ធិក្នុងការចាត់វិធានការណ៍តាមផ្លូវច្បាប់បន្ថែមដែរ។

ប៉ុន្តែមិនចប់ត្រឹមនេះទេ ព្រោះ Du Meizhu ក៏មិនស្ទាក់ស្ទើរក្នុងការសហការជាមួយនឹងប៉ូលីស ដើម្បីបង្ហាញភស្តុតាងផ្សេងៗ ដោយបំណងតបតជាមួយនឹង Kris។ នាងថា ទោះបី Kris ព្យាយាមលាក់បាំងយ៉ាងណាពីអ្វីដែលបានកើតឡើង ក៏នាងមិនខ្វះភស្តុតាងពីក្រោយដែរ។

ទាក់ទងនឹងរឿងនេះ បណ្ដាអ្នកលេងបណ្ដាញសង្គមក៏កើតមានការងឿងឆ្ងល់ដែរចំពោះភាពជឿជាក់របស់ Du Meizhu ក្នុងការអះអាងពីអ្វីដែលវាយបកចំពោះ Kris។ គ្រប់គ្នាគិតថា ការដែលនាងហ៊ានលើកយករឿងនេះមកបំប៉ោងពេញអ៊ីនធើណិតនេះ វាអាចជារឿងល្អក្នុងការធ្វើឲ្យហាងអនឡាញថ្មីរបស់នាងឆាប់ល្បី។ ទោះជាយ៉ាងណា ងាកទៅ Kris វិញ មហាជនជឿថារឿងគ្រប់យ៉ាងកើតឡើងបានទាល់តែមានដើមហេតុរបស់វា ព្រោះមានផ្សែង ប្រាកដជាមានភ្លើងពីក្រោយ ដូចនេះគ្រប់យ៉ាងនៅតែមិនអាចសម្រេចបានថាយ៉ាងណា រង់ចាំការដោះស្រាយ និងការបញ្ជាក់ជាបន្ទាប់នៅពេលក្រោយ៕

ប្រភព៖ jaynestars