ឮល្ហិចល្ហៀងមកថា លឹម ជាឡាយ ប៉ះគ្នាជាមួយតួធំមួយទៀត ក្នុងរឿង «ថ្ងៃមុនស្អប់ ថ្ងៃនេះស្រលាញ់»

2017-12-10 21:00:35
ភាពយន្ត

2017-12-10 21:00:35
ចំនួនមតិ 0 | ចំនួនចែករំលែក 0

ចន្លោះមិនឃើញ

លឹម ជាឡាយ តារាដែលមានអ្នកគំាទ្រស្រីចូលចិត្តច្រើន ពេលនេះមានពាក្យល្ហិចល្ហៀងមកថា អាចជាតួអង្គឯកក្នុងចំណោមតួអង្គឯក៣គូរបស់ «ថ្ងៃមុនស្អប់ ថ្ងៃនេះស្រលាញ់!» ប៉ុន្តែមិនមែនដើរតួអង្គ ហួត ខេមរិទ្ធ ទេ ប៉ុន្តែជាតួអង្គ ហួត យុត្ថានា ដែលមានកាយវិការឌឺដងបះសក់។

ប្រលោមលោក «ថ្ងៃមុនស្អប់ ថ្ងៃនេះស្រលាញ់» នឹងត្រូវថតជាខ្សែរឿងភាគខ្នាតធំទីពីរ បន្ទាប់ពីរឿង «ស្រទន់មន្តស្នេហ៍»។ គ្មានព័ត៌មានច្រើនត្រូវបានប្រភពទម្លាយចេញនោះទេ ទាក់ទងនឹងអ្នកណាត្រូវដើរតួអង្គសំខាន់ទំាង១២រូបក្នុងរឿងនេះ ប៉ុន្តែតួអង្គ ហួត ខេមរិទ្ធ ហួត យុត្ថនា ត្រូវបានប្រភពពី PNN ទម្លាយមកថា ជាតួ Grade A ទំាងអស់។

អ្នកនិពន្ធ ម៉ីសន សុធារី នៅព្រឹកនេះមិនបានធ្វើការបញ្ជាក់យ៉ាងណាអំពីវត្តមានលោក លឹម ជាឡាយ ក្នុងរឿងថ្មីនេះទេ ដោយឆ្លើយថា នេះផុតពីការទទួលខុសត្រូវរបស់លោកស្រីក្នុងការជ្រើសរើសតួសម្តែង ជានាទីរបស់ទូរទស្សន៍។

«ខ្ញុំមិនទាន់បានទទួលព័ត៌មានផ្លូវការណាមួយពីក្រុមការងារខាងទូរទស្សន៍ PNN លើតួអង្គធំៗទំាងអស់ ក្នុងរឿងភាគនេះនៅឡើយ គ្រាន់តែខ្ញុំដឹងថា ក្នុងចំណោមតួអង្គឯកទំាង៣គូ គឺគ្មានតួថ្មីនោះទេ ពួកគេសុទ្ធតែពេញដោយបទពិសោធន៍ និងមានតម្លៃខ្លួនខ្ពស់!»។

អ្នកនិពន្ធបន្តថា សូម្បីតែអ្នកដឹកនាំរឿង DOP និងអ្នកបច្ចេកទេសធំៗសម្រាប់រឿងក៏មិនទាន់ឈានដល់ដំណាក់កាលព្រមព្រៀងចុងក្រោយដែរ។

អ្នកនិពន្ធ ម៉ីសន សុធារី

ប្រលោមលោក «ថ្ងៃមុនស្អប់ ថ្ងៃនេះស្រលាញ់» គឺជាវីដេអូ៤០ភាគ ដែលស្ថានីយទូរទស្សន៍ PNN បានប្រកាសថា ខ្លួនបានសិទ្ធិលើប្រលោមលោកនេះ កាលពីសប្តាហ៍មុនហើយថាគេបានត្រៀមទំហំថវិកា និងធនធានមនុស្សច្រើនលើសពីរឿងភាគមុនៗក្នុងការបំពេញទៅតាមភាពលំបាកស្មុគស្មាញនៃខ្សែរឿងដែលមានអ្នកគាំទ្ររាប់លាននាក់។ «ខ្ញុំបានចូលរួមពេញទំហឹងជាមួយក្រុមការងារ PNN ក្នុងការធ្វើឲ្យតួសម្តែង និងសាច់រឿង ទទួលបានការពេញចិត្តពេញថ្លើមពីទស្សនិកជន» អ្នកនិពន្ធ បញ្ជាក់។