រឿងបែបមន្តអាគមទេ តែផ្តល់សារអប់រំឡើងអេម

2017-12-12 21:54:10
ភាពយន្ត

2017-12-12 21:54:10
ចំនួនមតិ 0 | ចំនួនចែករំលែក 0

ចន្លោះមិនឃើញ

«បើអ្នកដាំដើមអី រមែងទទួលបានផ្លែហ្នឹង» ជាសារអប់រំរបស់រឿងភាគថ្មី «ផ្ទះគ្រូទាយ» ដែលនឹងមានចាក់ផ្សាយលើកម្មវិធីទូរស័ព្ទ Soyo ក្នុងពេលឆាប់ៗនេះ។ សាច់រឿងបែបភ័យរន្ធត់ មន្តអាគមនេះ ប្រែក្លាយពីប្រលោមលោកដ៏មានប្រជាប្រិយភាពរបស់អ្នកនិពន្ធ ម៉ីសន សុធារី ដែលប្រើនាម ពេជ្រ បណ្ឌិត។

តួគ្រូទាយ

រឿង «ផ្ទះគ្រូទាយ» ដំណើរពីគ្រូមេមត់ដែលល្មោភលាភ សុខចិត្តធ្វើអំពើបាបតាមផ្លូវវិជ្ជាងងឹត បណ្តាលឱ្យអ្នកស្រុកមានការក្តៅក្រហាយ ដោយសារអំពើឆ្គួតលីលាប្តូរការស្លាប់រស់របស់មនុស្សធម្មតា តាមវិជ្ជាធ្មប់ ចុងក្រោយអំពើនោះក៏ត្រូវលាតត្រដាង ហើយអំពើដ៏ស្មោគគ្រោកនោះក៏សងឱ្យរូបគ្រូទាយនោះវិញយ៉ាងវេទនា។

គ្រូទាយ និងតួប្រពន្ធ ក្នុងរឿង ផ្ទះគ្រូទាយ

តាមរយៈអ្នកនិពន្ធ ម៉ីសន សុធារី បានឲ្យដឹងថា រឿងនេះតាំងពីផ្តើមសាច់រឿងបញ្ជូលសុទ្ធតែទស្សនៈអប់រំ និងបញ្ហាខ្លះៗក្នុងសង្គម ដូចជាការជឿជំនឿមិនពិត និងការប្រើប្រាស់ជំនឿអរូបិយដើម្បីតែប្រយោជន៍ផ្ទាល់ខ្លួន ហើយលទ្ធផលចុងក្រោយគ្រូទាយអស់ស្នៀត និងត្រូវរងទោសនូវអ្វីដែលខ្លួនបានធ្វើ។ «ថ្វីជារឿងបែបមន្តអាគមអូមអាម តែយើងមិន ភ្លេចបញ្ចូលនូវសារអប់រំខ្លះ ដាស់ស្មារតីកុំឲ្យមនុស្សធ្វើអំពើបាបតាមផ្លូវវិជ្ជាងងឹត» អ្នកនិពន្ធ បញ្ជាក់។

អ្នកនិពន្ធ ម៉ីសន សុធារី

លោក ឃុំ សុធារ៉ា អ្នកដឹកនាំរឿងភាគថ្មីនេះ បានប្រាប់ Sabay ឱ្យដឹងថា រឿងនេះជារឿងបែបមន្តអាគម ដូច្នេះ មានឆាកព្រឺព្រួចច្រើន តម្រូវឲ្យលោក និងក្រុមការងារធ្វើការដោយប្រុងប្រយ័ត្ន និងសម្រិតសម្រាំងបំផុតក្នុងការជ្រើសរើសទីតាំង តួអង្គ និងបច្ចកទេស។